ИМА ПЕШНИҲОДИ ЧИНРО РАД НАМУД

                     Вашингтон. 25 март. (АМИТ «Ховар» — РБК). — Роҳбари системаи федералии пули ИМА Бен Бернанке ва вазири молияи ин мамлакат Тим Гейтнер пешниҳоди Чинро дар бораи таъсиси пули нави ҷаҳонӣ рад намуданд. Онҳо зимни суханрониашон дар Кумитаи молиявии палатаи намояндагони конгресс зикр карданд, ки зарурати иваз кардани доллар бо ин ё он пули дигар вуҷуд надорад. Раиси Бонки миллии Чин Чжоу Сяочуан қабл аз ин изҳор карда буд, ки мамлакаташ иваз кардани доллари ИМА — ро ба пули дигари дорои аҳамияти умумиҷаҳонӣ пешниҳод менамояд.                      Ба қавли Чжоу Сяочуан, зарурати ҷорӣ намудани пули умумиҷаҳонӣ ба барҳам додани нуфузи пули як давлат дар саросари ҷаҳон, таъсири он ба иқтисодиёти мамлакатҳои ҷаҳон ва аз байн бурдани вобастагии мамлакатҳои дигар танҳо бо пули як давлат вобаста мебошад.