ИМА ПРОБЛЕМАҲОИ АФҒОНИСТОНРО ҲАМРОҲИ ЭРОН БАРРАСӢ КАРДАНИСТ

                    Вашингтон, 6 март (АМИТ «Ховар» — РБК). — ИМА қарор додааст Эронро ба конфронси байналхалқӣ даъват намояд, ки дар он роҳу усулҳои аз вартаи бӯҳрон наҷот додани Афғонистон муҳокима карда мешаванд. Дар ин бора котиби давлатии ИМА Хиллари Клинтон дар мулоқоти вазирони корҳои хориҷии мамлакатҳои аъзои НАТО дар Брюссел сухан ронд. Вай зикр намуд, ки намояндаи Эрон барои иштирок ба ин конфронс даъват карда хоҳад шуд.                    Президенти ИМА Барак Обама изҳор кард, ки ояндаи наздик ба Афғонистон ба таври илова 17 ҳазор аскару афсар фиристода мешавад. Айни ҳол дар ин мамлакат 38 ҳазор хизматчии ҳарбии ИМАҷой дода шудааст.  Инчунин қариб 30 ҳазор нафари дигар ба онҳо хизмат мерасонанд. Б. Обама изҳор намуд, ки маъмурияташ сиёсати худро нисбати Эрон тағйир дода, роҳу усулҳои машварати амалиро бо ин мамлакат ҷустуҷӯ хоҳад кард.