МАҶЛИСИ ШӮРОИ БАЙНИДАВЛАТИИ ИДМ ДАР ДУШАНБЕ БАРГУЗОР МЕГАРДАД

                  Душанбе, 25 март. (АМИТ «Ховар», Кристина Эрлих). — Рӯзҳои 1 ва 2 апрели соли равон дар шаҳри Душанбе маҷлиси навбатии 12 — уми Шӯрои байнидавлатии ИДМ бахшида ба масъалаҳои ҳамкорӣ дар соҳаи матбуоти даврӣ, нашри китоб, паҳн намудани он ва полиграфия баргузор хоҳад гашт. Аз дафтари матбуоти вазорати фарҳанг ба АМИТ «Ховар» хабар доданд, ки дар маҷлис ҷараёни иҷрои қарорҳои маҷлиси гузаштаи Шӯрои байнидавлатӣ баррасӣ карда мешавад.                   Иштирокчиёни маҷлис инчунин лоиҳаи Эъломияро дар бораи дастгирии чопи китоб, лоиҳаи Созишномаро дар бораи таҳия ва шартҳои қобили қабули мубодилаи мутақобалаи нашрияҳо, тайёрӣ ва гузаронидани Озмуни шашуми байналхалқии «Санъати чопи китоб» дар байни давлатҳои аъзои ИДМ, рафти иҷрои тадбирҳои Созишномаи ҳамкорӣ дар соҳаи нашри китоб ва таъсиси муассисаи нашриявии ИДМ, тадбирҳои Соли адабиёт ва хониш дар мамлакатҳои ИДМ, рафти иҷрои тавсияҳои анҷумани сеюми зиёиёни илмию эҷодкори мамлакатҳои ИДМ ва ғайраро баррасӣ хоҳанд кард.