МАРОСИМИ ШИНОСОӢ БО ФЕҲРАСТИ ЭЛЕКТРОНИИ 500 ДАСТХАТИ ҚАДИМА

                 Душанбе, 16 март. (АМИТ «Ховар», Покиза Маҳмадбекова). — Пагоҳ дар шаҳри Душанбе маросими шиносоӣ бо феҳрасти электронии 500 дастхати қадима бо забони форсӣ-тоҷикӣ (алифбои форсӣ), русӣ ва англисӣ баргузор мегардад. Ҷамъомади мазкур ҳамроҳи Пажӯҳишгоҳи шарқшиносӣ ва осори хаттии Академияи илмҳои Ҷумҳурии Тоҷикистон гузаронида мешавад.                 Тавре ба мухбири АМИТ «Ховар» аз Шӯъбаи Ташкилоти байналмилалии Институти «Ҷамъияти Кушода» — Бунёди Мадад хабар доданд, таҳияи феҳрасти мазкур кӯшиши аввалинест баҳри шиносоии оммаи васеи хонандагону пажӯҳишгарон бо осори хатти қадима аз марказҳои нигаҳдории осори хаттии ҷумҳурӣ — Пажӯҳишгоҳи шарқшиносии ба номи А.Мирзоев (380 дастхат) ва Китобхонаи миллии ба номи Фирдавӣ (120 дастхат) мебошад. Ҳамчунин қайд гардид, ки дар феҳрасти электронӣ номгӯи китоб, муаллифи он, санаи тартиб додани дастхат, мавзӯъ ва мундариҷаи он, таърих ва макони дарёфт ва шумори саҳифаҳо дарҷ ёфтаанд.