МАШВАРАТИ КОРШИНОСОНИ СААД

                   Маскав, 17 март (АМИТ «Ховар», Ҳалима Хушқадамова). — Имрӯз дар Маскав машварати коршиносони давлатҳои аъзои СААД дар масъалаи ташкили Қувваҳои мусаллаҳи дастаҷамъии вокуниши таъҷилӣ оғоз ёфт. Гурӯҳи кории созмон бо мақсади амалӣ сохтани қарорҳои мулоқоти ғайринавбатии аъзои Шӯрои амнияти дастаҷамъии СААД дар бораи ташкили Қувваҳои мусаллаҳи дастаҷамъии вокуниши таъҷилӣ лоиҳаи ҳуҷҷатҳои меъёрӣ ва қонуниро таҳия намуд, ки фаъолияти қувваҳои мазкурро ба низом медароранд. Коршиносон пешниҳодот, таклифҳо ва эродҳои намояндагони давлатҳои аъзои созмонро баррасӣ мекунанд. Муовини муншии умумии СААД Валерий Семериков ба хабарнигорон гуфт, ки дар машварат намояндагони шӯроҳои амният, вазоратҳои корҳои хориҷӣ, мудофиа, муҳофизи қонун ва хадамоти махсуси давлатҳои аъзои созмон иштирок доранд.