МУЛОҚОТИ МАҶЛИСИ САРОНИ ҲУКУМАТҲОИ ИДМ ДАР ОСТОНА

                       Душанбе, 25 март. (АМИТ «Ховар», Наргис Бояхмедова). — 22 май дар пойтахти Ҷумҳурии Қазоқистон — шаҳри Остона маҷлиси Шӯрои сарони ҳукуматҳои мамлакатҳои ИДМ баргузор мегардад. Дар ин бора дар маҷлиси навбатии Шӯрои намояндагони доимии ваколатдори давлатҳои Иттиҳод хабар дода шуд, ки 20 март дар Минск баргузор гардид.                         Ба муҳокимаи маҷлиси сарони ҳукуматҳои мамлакатҳои ИДМ 20 масъала пешниҳод карда шудааст. Онҳо, аз ҷумла, нақшаи тадбирҳои амалӣ сохтани даври аввали Барномаи стратегии рушди иқтисодии ИДМ — ро то соли 2020, тағйироту иловаҳоро ба барномаи стратегии ҳамкорӣ дар соҳаи иттилоот ва Нақшаи тадбирҳоро барои амалӣ сохтани он то соли 2010 муҳокима хоҳанд кард. Инчунин, ба муҳокимаи маҷлиси Шӯрои сарони ҳукуматҳо Нақшаи тадбирҳои муштараки таъсиси низоми воҳиди ба ҳисоб гирифтани шаҳрвандони давлатҳои дигар ва шаҳрвандони бетабаият, ки ба қаламрави мамлакатҳои ИДМ дохил мешаванд ва масъалаҳои дигари марбут ба соҳаҳои иҷтимоӣ, молиявӣ ва амният муҳокима карда хоҳанд шуд.