САҲИФАИ МАХСУСИ ИНТЕРНЕТ ДАР БАЛҶУВОН

                   Балҷувон, 10 март. (АМИТ «Ховар», Сулаймон Холов).-Бо маблағгузории Кумитаи Телевизион ва Радиои назди ҳукумати Ҷумҳурии Тоҷикистон, Вазорати фарҳанг, Вазорати иқтисод ва савдои назди Ҳукумати Ҷумҳурии Тоҷикистон дар ноҳияи Балҷувон мувофиқи нақшаи дурнамои солҳои 2002-2012 саҳифаи махсус дар шабакаи ҷаҳонии Интернет, таҳияи филмҳои видео, ташкили маҳсулоти рекламавӣ оид ба захираҳои туристии ноҳияи Балҷувон бо истифода ва имкониятҳои молиявии собиқадорони дохилии туристӣ таъсис ёфт. Раиси ноҳияи Балҷувон Бек Қурбонов зимни як нишасти матбуотӣ ба хабарнигорон изҳор дошт: «Айни ҳол дар ноҳия ду саҳифаи махсуси Интернет «Тос Балҷувон» ва «Сари-Хосор» кушода шудааст. Инчунин филмҳои мустанади телевизионии «Диёри Балҷувон», «Балҷувон дар давраи тамаддуни Ориёӣ», «Аз субҳ то шоми Балҷувон», «Шоҳи Аккоша», «Шакл» ба навор гирифта шуда манзури тамошобинон гардонида шуданд».