САФИРИ ИМА ДАР НОҲИЯИ ВАХШ

                      Қӯрғонтеппа, 6 март (АМИТ «Ховар», Мурод Сотиев). — Сафири кабири ИМА дар Тоҷикистон Трейси Энн Ҷейкобсон 5 март барои боздиди корӣ ба ноҳияи Вахш рафт. Вай дар ин ҷо бо ҷараёни тақсими кӯмаки башардӯстона ба сокинони маркази ноҳия шинос шуд.                       Сафир зимни сӯҳбат бо мухбири АМИТ «Ховар» зикр кард, ки кӯмаки башардӯстона дар доираи яке аз барномаҳои хайрияи Департаменти давлатии ИМА расонда мешавад. Вай афзуд, ки ба сокинони минтақаҳои дигари Тоҷикистон низ кӯмаки хайрия расонда хоҳад шуд.                       Тибқи нақша, дар вилояти Хатлон ба бештар аз 8 ҳазор оила ва дар вилояти Суғд ба 3,5 ҳазор оила аз тарафи Агентии рушди байналмилалии ИМА кӯмаки хайрия расонда мешавад. Сафир зикр намуд, ки кӯмаки хайрия аз 200 килограмм орд, 50 килограмм наск ва 16 килограмм равғани наботӣ иборат аст.