СЕХҲОИ НАВИ ДӮЗАНДАГӢ МЕАФЗОЯНД

                  Хоруғ, 18 март. (АМИТ «Ховар», Бекназари Абӯбакр). — Дар шаҳри Хоруғ сехи нави дӯзандагии «Ҳаёт» ба фаъолият шурӯъ намуд, ки дар натиҷа 20 нафар ҷавондухтарон бо ҷойи кори доимӣ таъмин шуданд. Бояд гуфт, ки аз соли 2006 дар ҷумҳурӣ ба хотири рушди соҳибкории хурду миёна грантҳои президентӣ ҷудо мегарданд.                   Раиси Кумитаи кор бо занон ва оилаи мақомоти иҷроияи ҳокимияти давлатии ВМКБ Ҳарамбегим Маҳтобшоева ба мухбири АМИТ «Ховар» иттилоъ дод, ки дар тӯли 3 сол дар вилоят 2 нафарӣ соҳиби ин грант гардиданд. Соли ҷорӣ бошад, 5 нафар тариқи гранти президентӣ дар шаҳри Хоруғ, ноҳияҳои Роштқалъа, Ишкошим ва Мурғоб сехҳои дӯзандагӣ кушоданд ва дар ноҳияи Рӯшон 1 нафар сехи коркарди мева ташкил намуд.                   Маврид ба зикр аст, ки ҳадаф аз ҷудо намудани грантҳои президентӣ, ки тариқи Кумитаи кор бо занон ва оилаи назди Ҳукумати ҷумҳурӣ амалӣ карда мешаванд, бо кор таъмин намудани занону духтарони деҳот ва рушди истеҳсолот дар минтақаҳо мебошад.