БУНЁДКОРИҲО БО НЕРӮИ ҲАШАРЧИЁН

              Бадахшон, 24 апрел. (АМИТ «Ховар», Лутфишо Додо).- Тариқи ҳашар ободу зебо намудани диёр анъаноти ниёгони мост. Ҳар сол маҳз бо чунин ташаббуси хайрхоҳонаву ватандӯстона корҳои зиёди ободониву кабудизоркунӣ сомон дода мешавад. Соли ҷорӣ низ дар доираи нақшаи «700 рӯзи ободонӣ» сокинони деҳот дар таъмири роҳҳову ҷуйборҳо, бунёди боғҳои наву эҳёи боғоти кӯҳна, гулгаштҳо, ниҳолшинонӣ ҳиссагузорӣ мекунанд. Танҳо дар ҳафтаи ҷорӣ дар ҷамоати деҳоти Тусиёну Тавдеми ноҳияи Роштқалъа дар ҳашари умумие, ки рӯзҳои шанбею якшанбе ва баъди итмоми кор баргузор гардиданд, таи дуюним ҳазор нафар ширкат варзида, дар таъмири 9 ҷуйбор, 4 канали калони обгузар, 20 км таъмири хатти интиқоли оби ошомиданӣ, таъмири боғоти мавзеҳои Сазду Зигур, Нудҷу Риҷист, Хидорҷеву Тавдем таъмири роҳҳои мошингарди Бодому Сумҷев ва дигар деҳоти ноҳияи Ишкошим саҳм гирифтанд.