ДАР ҶАНУБИ АФҒОНИСТОН ГУРӮҲИ СИЛОҲБАДАСТОН НОБУД КАРДА ШУДАНД

              Кобул, 6 апрел. (АМИТ «Ховар» — «Свобода» ). — Қисмҳои ҳарбии хориҷӣ ҳамроҳи хизматчиёни ҳарбии артиши Афғонистон рӯзҳои истироҳати гузашта дар ҷануби мамлакат дар натиҷаи як амалиёти мусаллаҳона гурӯҳи калони силоҳбадастонро нобуд карданд. Амалиёт дар вилояти Ҳилманд анҷом дода шуд. Силоҳбадастон, аз ҷумла, қумондони онҳо дар пойгоҳи низомии худ ҳадафи оташ қарор гирифтанд.              Як силоҳбасти дигар зимни ҳуҷуми гурӯҳи ҷангиён ба дастаи посбонони қувваҳои низомии хориҷӣ кушта шуд. Намояндаи ҳайати қумондонии ҷузъу томҳои низомии Амрико хабар дод, ки дар давоми чанд шабонарӯзи охир танҳо дар вилояти Ҳилманд дар натиҷаи задухӯрдҳои мусаллаҳона бештар аз 50 силоҳбадаст нобуд гардид. Тавре ки маълум аст, вилояти Ҳилманд дар бобати истеҳсоли маводи нашъадор дар байни вилоятҳои дигари Афғонистон яке аз ҷойҳои аввалинро ишғол менамояд. Инчунин дар ин ҷо теъдоди зиёди дастаҳои мусаллаҳи ҷангиён амал мекунанд.