КОНФРОНСИ БАЙНАЛХАЛҚӢ БАХШИДА БА БӮҲРОНИ ҶАҲОНИИ МОЛИЯВ&#12

                  Душанбе, 9 апрел. (АМИТ «Ховар», Фарангис Раҳимова). — Маҷмаи кулли Созмони Милали Муттаҳид дар бораи гузаронидани конфронси байналхалқие қабул намуд, ки дар он сабабҳои ба амал омадани бӯҳрони ҷаҳонии молиявию иқтисодӣ ва оқибатҳои он барои мамлакатҳои ҷаҳон мавриди муҳокима қарор дода мешаванд. Конфронси мазкур аз 1 то 3 июн дар Ню — Йорк баргузор мегардад. Давлатҳои аъзои СММ ба муншии умумии он Пан Ги Мун супориш доданд, ки дар бораи сабабҳо ва оқибатҳои бӯҳрони ҷаҳонии молиявӣ, роҳу усулҳои бартараф сохтани оқибатҳои он, зиёни имконпазири бӯҳрон ба иқтисодиёти мамлакатҳои ҷаҳон ва тадбирҳои пешгирӣ намудани зарари бӯҳрон маърӯза тайёр кунад.                Дар конфронс бахшида ба тадбирҳои бартараф сохтани оқибатҳои бӯҳрон ҳуҷҷати ниҳой қабул карда мешавад. Дар он роҷеъ ба таъсири бӯҳрон дар соҳаҳои бо кор таъмин намудани аҳолӣ, тиҷорат, сармоягузорӣ, инчунин роҳҳои ба даст овардани ҳадафҳои рушди ҳазорсола тавсияҳо дода мешаванд.