МОЛДОВА ДАР ОСТОНАИ ИНТИХОБОТИ ПАРЛУМОНИСТ

               Душанбе, 4 апрел. (АМИТ «Ховар», Марзия Саидова).- Фардо, 5 апрел дар Молдова интихоботи парлумонӣ баргузор мешавад.              Дар ин чорабинии муҳими сиёсӣ дар қатори нозирони кишварҳои хориҷӣ намояндагони Ҷумҳурии Тоҷикистон низ аз ҷараёни интихоботи парлумонӣ дар ин кишвар мушоҳида менамоянд.               Тибқи иттилои роҳбари дастгоҳи Комиссияи марказии интихобот ва райъпурсии ҷумҳурӣ Муҳибулло Додоҷонов, дар интихоботи парлумонии Молдова намояндаи Тоҷикистон дар Иттиҳоди Давлатҳои Мустақил Сафаралӣ Ғуломов дар ҳайати нозирони ИДМ ва Аминҷон Ҳасанов дар ҳайати нозирони Созмони амнияту ҳамкории Аврупо ба ҳайси нозир иштирок менамоянд.              Назар ба иттилои хабаргузории иттилоотии «REGNUM», 3 апрел Раиси Комиссияи интихоботии Молдова Евгений Штирибу дар нишасти матуботӣ ба харабнигорон гуфтааст, ки бо мақсади дар сатҳи баланди сиёсӣ гузаронидани интихоботи парлумон дар Молдова 1977 қитъаи интихоботӣ ташкил карда шудааст. Ҳамзамон, дар 33 намояндагии дипломатии Молдова дар кишварҳои хориҷӣ қитъаҳои интихоботӣ созмон дода шудааст.