МУЛОҚОТИ Э. РАҲМОН БО Н. БОРДЮЖА

             Президенти Ҷумҳурии Тоҷикистон Эмомалӣ Раҳмон Дабири кули Созмони Аҳдномаи амнияти дастаҷамъӣ Николай Бордюжаро ба ҳузур пазируфт.             Дар мулоқот масоили ҳамкорӣ дар доираи ин созмон ва болобарии минбаъдаи нуфузу эътибори он дар арсаи ҷаҳонӣ баррасӣ шуд.Таваҷҷӯҳи махсус ба ҳалли масоили ҳуқуқии ташкилдиҳӣ, ҳайат, фаъолият ва мавриду рохҳои истифодаи Нерӯҳои дастаҷамъии зудамал зоҳир карда шуд.              Масоили ҳамкории ҳарбӣ-техникӣ ва омода кардани кадрҳои низомӣ барои Қувваҳои Мусаллаҳи Тоҷикистон низ аз мавзӯъҳои асосии сӯҳбат буд.              Мубодилаи судманди афкор ҳамчунин оид ба авзои кунунии Афғонистон ва минтақа сурат гирифт.              Хотиррасон бояд кард, ки ҳамаи ин ва дигар масоил дар мулоқоти ояндаи сарони давлатҳои аъзои Созмони Аҳдномаи амнияти дастаҷамъӣ, ки моҳи июни соли равон дар шаҳри Маскав баргузор мегардад, мавриди баррасӣ қарор хоҳанд гирифт. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.