НАСБИ ЛАВҲАҲОИ МАХСУС ДАР ИСТГОҲҲОИ ПОЙТАХТ

                Душанбе, 4 апрел.(НИАТ «Ховар», Марзия Саидова).-Минбаъд дар истгоҳҳои мусофиркашонии пойтахт лавҳаҳои махсус, ки фосилаи ҳаракати нақлиёти мусофирбариро дар шаҳр ба танзим медароранд, насб карда мешаванд.                Назар ба иттилои муовини Раиси шаҳри Душанбе Абдуҳомид Шералиев, ҳадаф аз андешидани ин иқдом ба танзим даровардани ҳаракати хатсайрҳои нақлиёти ҷамъиятӣ дар шаҳр ва хизматрасонии саривақтию босифат ба мусофирон аст.                Бояд зикр кард, ки фосилаи ҳаракати нақлиёти ҷамъиятӣ дар пойтахт аз ҷумла, автобусҳо аз 3 то 6 дақиқа буда, дар ҳар 12 дақиқа як автобус дар хатсайри вобасташуда ба ҳаракат мебарояд. Дар маҷмӯъ дар шаҳр беш аз 500 адад автобусу троллейбус аз соати 5- 30 дақиқаи субҳ то 23 шаб ба мусофирон хизмат мерасонанд.                Алҳол дар пойтахт қариб 500 истгоҳ вуҷуд дорад, ки баъзеи онҳо таъмирталаб, баъзеи дигараш дар ҳолати азнавсозию таҷдид қарор доранд.