ПАЙВАНДҲОИ ФАРҲАНГИИ КИШВАРҲОИ ФОРСИЗАБОНРО «ИРФОН» ЧОП КАРД

                 Душанбе, 11 апрел.(АМИТ «Ховар», Марзия Саидова).- Нашриёти «Ирфон» маҷмӯаи мақолаҳои илмии устодон ва донишҷӯёни мактабҳои олии се кишвари ҳамзабон — Тоҷикистон, Афғонистон ва Эронро таҳти унвони «Фарҳанг ва омӯзиш дар ҳавзаи тамаддуни иронӣ» аз чоп баровард.                 Китоб бо забонҳои тоҷикӣ, русӣ ва ҳуруфоти форсӣ бо теъдоди 500 нусха аз ҷониби Пажӯҳишгоҳи илмҳои педагогии Академияи илмҳои педагогии Ҷумҳурии Тоҷикистон, Донишгоҳи Давлатии омӯзгории Тоҷикистон ба номи С. Айнӣ ва Бунёди эроншиносии тоҷик нашр шудааст. Мураттиб ва муҳаррири масъули он доктори илмҳои педагогӣ, профессор Сафар Сулаймонӣ аст.                Дар маҷмӯа рисолаҳои илмии устодон ва унвонҷӯёни давраи доктории кишварҳои ҳамзабон -Тоҷикистон, Афғонистон ва Эрон гирд оварда шудаанд. Бори нахуст дар ин мақолаҳо мушкилот ва муштаракоти фарҳангӣ ва омӯзишии ҳавзаи тамаддуни эронӣ мавриди баррасӣ қарор гирифтааст. Бештари мақолаҳои ин китоб тибқи пажӯҳишҳои ҷомеашиносӣ анҷом ёфта, нуктаҳои аслии мавзӯъ рисолаҳои илмии донишҷӯёнро дар бар мегирад.                 Маҷмӯаи мазкур барои рушди робитаҳои фарҳангии се кишвар муфид буда, дар таҳкими муносибатҳои илмию фарҳангии ҳавзаи тамаддуни кишварҳои форсизабон нақши муассир мегузорад.