ПОРТАЛИ ЯГОНАИ ИТТИЛООИИ ЭКО ТАШКИЛ МЕШАВАД

                Душанбе, 24 апрел.(АМИТ «Ховар», Марзия Саидова).-Китобхонаҳои миллии кишварҳои аъзои Созмони Ҳамкории Иқтисодӣ (ЭКО) соҳиби портали ягонаи иттилоотӣ мегарданд.                Ин масъала дар ҷараёни баргузории конфронси директорони китобхонаҳои миллии давлатҳои аъзои ин созмони бонуфузи иқтисодӣ дар шаҳри Боку — пойтахти Озарбойҷон баррасӣ ва тасдиқ шуд.                Директори китобхонаи миллии Тоҷикистон ба номи Абулқосим Фирдавсӣ Шариф Тошев, ки Ҷумҳурии Тоҷикистонро дар ин нишаст намояндагӣ кард, зимни мусоҳиба ба хабарнигори АМИТ «Ховар» гуфт, ки портали махсуси интернетии иттилоотӣ бо мақсади рушду нумуъи китобхонаҳо, тақвияти ҳамкории мутақобилан судманд дар бахши китобдорӣ, табодули иттилоот ташкил карда мешавад.                Дар доираи баргузории конфронс намоиши китоби давлатҳои аъзои ЭКО дар гӯшаҳои махсус ташкил гардид, ки ба мавзӯҳои гуногуни сиёсию иқтисодӣ ва иҷтимоию фарҳангии давлатҳо бахшида шуда буд. Дар конфронс ба ғайр аз директори китобхонаи миллии Афғонистон, сарварони китобхонаҳои 9 давлати дигари ЭКО иштирок доштанд.