ТАРМА ОМАД

                Бадахшон, 28 апрел. (АМИТ «Ховар», Лутфишо Додо).- Рӯзи 3-юм аст, ки дар ВМКБ борони сел меборад. Дар Бадахшон одатан нисбат ба барф хатари борон бештар аст. Зеро бар асари боришоти зиёд кӯҳҳо нам гирифта, сангҳои калон ва ҳатто кӯҳ канда мешавад. Ва чун санге канда шавад, ҳамроҳи худ даҳҳо ва балки садҳо санги хурду калонро ғелонда рӯи водиҳо ҳаракат мекунанд.                Тавре навбатдори Ситоди ҳолатҳои фавқулодда ва мудофиаи граждании ВМКБ лейтенанти хурд Алишоҳ Шоҳсулаймонов хабар дод, шаби 27-ум ба 28-уми моҳи апрел дар деҳаи Хехаки ноҳияи Ванҷ сел роҳро маҳкам кардааст. Дар километри 11-ум ва 16-уми шоҳроҳи Хоруғ-Роштқалъа низ аз кӯҳҳо сангҳои калоне канда шуда, ҳаракати нақлиётро банд карданд. Ба ғайр аз ноҳияҳои Роштқалъа, ки шиддати борон хеле зиёд аст, дар мавзеъҳои дигар техникаи селу тарматозакунии идороти роҳсозӣ фаъолият доранд.