А.МЕРНИЕ: «МО БА ТОҶИКИСТОН ДАР ҲАЛЛИ ПРОБЛЕМАҲОИ ЭНЕРГЕТИКӢ КӮ

                Душанбе, 6 май. (АМИТ «Ховар», Фарангис Раҳимова). — Президенти Ҷумҳурии Тоҷикистон Эмомалӣ Раҳмон қабл аз чошти имрӯз бо Муншии умумии Созмони аҳдномаи энергетикӣ Андре Мерние мулоқот кард. А.Мерние баъди анҷоми мулоқоташ зимни сӯҳбати мухтасар бо хабарнигорон зикр намуд, ки мулоқоташ бо Сарвари давлати Тоҷикистон мароқовар ва пурмӯҳтаво буд. «Мо бо Президенти мамлакати шумо чандин сол боз ҳамкорӣ мекунем ва ин ҳамкорӣ ба ақидаи ман дар давоми ин солҳо самарабахш буд. Ман зикр намудам, ки аз проблемаҳои Тоҷикистон дар соҳаи энергетика ба хубӣ огоҳам. Бинобар ин Созмони аҳдномаи энергетикӣ тайёр аст ба Тоҷикистон дар ҳалли онҳо кӯмак расонад. Ман, инчунин, ақидаи худро дар бораи барномаҳои ҳамкории Тоҷикистон бо Афғонистону Покистон дар соҳаи энергетика баён намудам», гуфт А.Мерние.               Муншии умумии Созмони аҳдномаи энергетикӣ ба тадбирҳои роҳбарияти Тоҷикистон дар масъалаи истифода бурдани чароғакҳои каммасрафи барқӣ баҳои мусбат дод. Иттиҳоди Аврупо низ айни ҳол чунин роҳи сарфа кардани қуввваи барқро пеш гирифтааст. Ман ба ҷаноби Президент гуфтам, ки иқдоми роҳбарияти Тоҷикистон дар соҳаи таъмини самаранокии истифодаи қувваи барқ натиҷаи дилхоҳ хоҳад дод. Мо воситаҳои техникие дорем, ки ба Тоҷикистон барои боз ҳам бештар сарфа кардани қувваи барқ кӯмак расонда метавонанд, зикр намуд Муншии умумии Созмони аҳдномаи энергетикӣ.                Меҳмон дар ҷавоби саволи хабарнигорон дар бораи имкониятҳои миёнаравии созмон дар байни Тоҷикистону Ӯзбекистон дар масъалаи сохтмони нерӯгоҳҳои барқӣ изҳор намуд, ки ба расондани кӯмак дар ин масъала омода мебошад. Ҳалли ин масъала аз бисёр ҷиҳат ба мавқеъ ва иродаи сиёсии ҳар ду мамлакат вобаста аст, гуфт вай. Дар фарҷоми сӯҳбат қайд карда шуд, ки А.Мерние рӯзҳои наздик ба Ӯзбекистон меравад ва ин масъаларо бо роҳбарияти ин мамлакат мавриди баррасӣ қарор хоҳад дод.