ИСТЕҲСОЛИ БАРҚ ДАР ЯК РӮЗ БА 50 МЛН.кВт СОАТ РАСИД

                     Душанбе, 14 май. (АМИТ «Ховар», Лаззат Диловарзод).- Аз ширкати холдинги «Барқи тоҷик» иттилоъ доданд, ки истеҳсоли якрӯзаи барқи ҷумҳурӣ беш аз 50 млн. кВт соатро ташкил медиҳад.                   Ҷумҳурии Тоҷикистон аз 1 -уми май ба баргардонидани барқи тибқи қаpордод аз ҷумҳуриҳои Туркманистон, Ӯзбекистон ва Қазоқистон гирифтааш оғоз кард.                     Ёдовар мешавем, ки дар давоми моҳҳои ноябр-апрели солҳои 2008-2009 аз Ҷумҳурии Туркманистон беш аз 1 млрд. кВт соат нерӯи барқ ба Тоҷикистон ворид карда шудааст. Аз Ҷумҳурии Ӯзбекистон дар давоми моҳҳои феврал- апрели соли 2009 ба Тоҷикистон ҳамагӣ 251 млн. кВт соат нерӯи барқ ворид гардид, ки он нисбат ба шартнома 50 млн. кВт соат камтар аст.                       Аз 1-уми май сар карда аз Ҷумҳурии Тоҷикистон ба Ҷумҳурии Қазоқистон дар як шабонарӯз интиқоли 5 млн. кВт соат ба роҳ монда шудааст. Қарзи Тоҷикистон аз Қазоқистон ҳамагӣ 88 млн. кВт соатро ташкил медиҳад.