КИТОБИ НАВ БАРОИ ХОНАНДАГОНИ ХУРДСОЛ

                     Душанбе, 13май. (АМИТ «Ховар», Лутфия Эшонқулова).- Созмони байналмиллалии «Истиқбол» барои наврасон 10 шеъри беҳтарини шоиру оҳангсозони тоҷикро гирд оварда, китоби «Даҳ суруди нағз»-ро пешкаши хонандагони хурдсол намуд. Тавре ба мухбири АМИТ «Ховар» роҳбари созмон Латофат Кенҷаева хабар дод, китоби мазкур бо теъдоди 5 ҳазор нусха, зери таҳрири шоир Ҷӯра Ҳошимӣ нашр гардид. Л. Кенҷаева зикр намуд, ки китоб дар давоми 2 сол ба чоп омода карда шуд.Китоб шеърҳои шоирони маъруф Абдусалом Деҳотӣ, Муҳиддин Фарҳат ва Гулчеҳра Сулаймониро дар бар мегирад, ки шеърҳои онҳо байни наврасон машҳур гаштаанд. Ҳамаи шеърҳои он соддаю равон буда, хонандагони хурдсол онҳоро ба осонӣ аз ёд карда метавонанд. Шеърҳои китоб ба шакли суруд дароварда, ҳамроҳи адвор (нота) ба хонандагон пешкаш карда шуданд. Ин кори мураббиёни боғчаҳои бачагона ва муаллимони фанни сурудро хеле осон хоҳад кард.                       Бояд қайд намуд, ки нашриёти «Истиқбол» дар давоми 3 моҳ 6 китоби навро барои кӯдакону наврасон ба табъ расонид.