МАҶЛИСИ ШӮРОИ АССАМБЛЕЯИ ПАРЛУМОНИИ СААД

                     Маскав, 13 май. (АМИТ «Ховар», Ҳалима Хушқадамова). — Имрӯз дар шаҳри Санкт — Петербург маҷлиси Шӯрои Ассамблеяи парлумонии Созмони аҳдномаи амнияти дастаҷамъӣ кушода мешавад. Дар он масъалаҳои марбут ба иҷрои қарорҳои маҷлиси Шӯрои амнияти дастаҷамъии дар Маскав баргузоргардида, барномаи таъминоти ҳуқуқии нақшаи тадбирҳои асосии тавсеаи ҳамкории байни давлатҳо, такмил додани низоми амнияти дастаҷамъӣ дар доираи СААД дар давраи то соли 2010 ва низомномаи фаъолияти Ассамблеяи парлумонии СААД муҳокима карда мешаванд.                    Директори Хадамоти Федералии муҳоҷирати Русия, раиси Шӯрои ҳамоҳангсози роҳбарони ваколатдори мақомоти давлатҳои аъзои созмон К.Ромодановский роҷеъ ба вазъияти имрӯзаи муҳоҷирати коргарон дар мамлакатҳои аъзои созмон ҳисобот медиҳад.                   Инчунин таҷрибаи Маҷлиси миллии Ҷумҳурии Белорусия дар бораи тасвиби ҳуҷҷатҳои байналхалқии дар доираи СААД қабулгардида ва натиҷаҳои фаъолияти ҳайатҳои парлумонии давлатҳои аъзои созмон дар ҷараёни маҷлисҳои зимистонаи Ассамблеяи парлумонии САҲА таҳлил карда мешаванд.                   Дар маҷлис масъалаи тайёрӣ ба ҷашни 65 — солагии ғалаба дар Ҷанги Бузурги Ватанӣ ва таҷлили мулоқоти сеюми байналмилалии ташкилотҳои ҳарбӣ ва варзишии ҷавонон мавриди баррасӣ қарор дода мешавад.