НИКОЛАЙ БОРДЮЖА БА ТОШКАНД РАФТ

                         Маскав, 21 май. (АМИТ «Ховар», Ҳалима Хушқадамова). — Муншии умумии Созмони аҳдномаи амнияти дастаҷамъӣ Николай Бордюжа 21 май барои боздиди корӣ ба Ҷумҳурии Ӯзбекистон рафт.                          Ӯ қабл аз парвоз дар майдони ҳавоӣ ба хабарнигорон гуфт, ки сафар аз рӯи нақша сурат мегирад. Дар ҷараёни он масъалаҳои тайёрӣ ба мулоқоти сарони давлатҳои аъзои созмон баррасӣ карда мешаванд, ки моҳи июн баргузор мегардад. Инчунин, ҷараёни иҷрои қарорҳои маҷлиси ғайринавбатии Шӯрои амнияти дастаҷамъии созмон муҳокима карда мешавад, ки моҳи феврал баргузор гардида буд. Мо ҳамчунин дар Тошканд масъалаҳои марбут ба ташкили Қувваҳои дастаҷамъии вокуниши таъҷилиро муҳокима мекунем, гуфт Н.Бордюжа.                          Мавсуф дар Тошканд бо роҳбарияти дастгоҳи Шӯрои амнияти миллӣ, вазоратҳои корҳои хориҷӣ ва мудофиаи Ӯзбекистон мулоқотҳо анҷом хоҳад дод.                              Аз дафтари матбуоти котиботи СААД ба АМИТ «Ховар» хабар доданд, ки Николай Бордюжа дар давоми яку ним моҳи охир барои муҳокимаи ин масъалаҳо ба Арманистон, Қирғизистон, Тоҷикистон ва Белорусия сафар кард.