СОЗМОНҲОИ САРМОЯГУЗОР ВА КИШВАРҲОИ ДОНОР БА ТОҶИКИСТОН КӮМАК МЕКУНАНД?

                      Душанбе, 14 май. (АМИТ «Ховар», Бекназари Абӯбакр). -13 май дар шаҳри Душанбе мулоқоти роҳбарони блоки иқтисодию иҷтимоии Ҳукумати Ҷумҳурии Тоҷикистон бо созмонҳои байналмилалии сармоягузор ва намояндагони кишварҳои донор баргузор гардид.                     Дар ин мулоқот масъалаи таъсири бӯҳрони молиявӣ-иқтисодии ҷаҳонӣ ба иқтисодиёти Тоҷикистон ва роҳҳои бартараф намудани он мавриди баррасӣ қарор дода шуд.                   Вазири молияи Ҷумҳурии Тоҷикистон Сафаралӣ Наҷмиддинов зимни муаррифии барномаи зиддибӯҳронии Ҳукумати ҶТ ба созмонҳои сармоягузор ва кишварҳои донор зикр намуд, ки дар давоми чор моҳи гузашта ҳаҷми даромади буҷети кишвар аз ҷамъоварии андозҳо коҳиш ёфта, ҳаҷми истеҳсолот низ поён рафт. Аз ин рӯ, иҷрои барномаи зиддибӯҳронии давлатӣ ба маблағҳои кӯмаки кишварҳои донор ва созмонҳои сармоягузор ниёз дорад.                   Намояндагони созмонҳои сармоягузор ва кишварҳои донор иброз доштанд, ки тақозои Ҷумҳурии Тоҷикистон дар мавриди кӯмаки иловагӣ ба роҳбарияти созмонҳои сармоягузор ва мақомоти кишварҳои донор расонида, дар ин самт мусоидат хоҳанд кард.