МОДАРИ БОМАЪРИФАТ — ГАРАВИ САЛОМАТИИ КӮДАК АСТ

                           Душанбе, 2 июн. (АМИТ «Ховар», Ибодат Давлатова). — Бо ибтикори Маркази шаҳрии тибби оилавӣ дар якҷоягӣ бо Маркази ҳамбастагии бемориҳои кӯдакона ва дастгирии Раёсати тандурустии шаҳри Душанбе озмуни «Беҳтарин модари соли 2009» гузаронида шуд, ки аз тарафи ташкилоти ЗдравПлюс ЮСАИД дастгирӣ ва маблағгузорӣ гардид.                          Тавре аз маркази матбуоти Вазорати тандурустии Ҷумҳурии Тоҷикистон хабар доданд, ҳадаф аз гузаронидани чунин озмун — баҳодиҳӣ ба фаъолияти духтурон ва ҳамшираҳои тибби оилавӣ оид ба баланд бардоштани сатҳи маърифатнокии тиббӣ ва иттилоотии модарон дар бахши ҳамбастагии бемориҳои кӯдакона мебошад.                        Бо мақсади дар сатҳи марказҳои саломатии шаҳрӣ гузаронидани озмун моҳи апрели соли равон бо фармони Раёсати тандурустии шаҳри Душанбе Оинномаи озмун тасдиқ карда шуда буд.                          Тавре ки директори Маркази шаҳрии тибби оилавӣ Фирӯза Абдуллоева изҳор дошт, — озмун дар ду марҳила гузаронида шуда, дар даври аввал 131 нафар ва дар даври хотимавӣ 14 нафар модарон иштирок намуда, донишу малакаи худро оид ба пешгирии бемориҳои кӯдакона намоиш доданд.                         Дар даври ниҳоӣ се нафар довталабон — Шоира Раҳимҷонова аз МСШ №1, Нигина Сатторова аз МСШ №12 ва Озода Акрамова аз МСШ №2 ғолиб омаданд. Ғолибони озмун ва ҳамаи иштирокчиён бо тӯҳфаҳои хотиравӣ сарфароз гардонида шуданд.