ДАР ВМКБ АНҶУМАНИ ПАЙВАНД ТАЪСИС ЁФТ

                  Бадахшон, 30 июл. (АМИТ «Ховар», Л. Додо).- Дар шаҳри Хоруғ бахши вилоятии комиҷроияи Анҷумани тоҷикону форсизабонони дунё «Пайванд» ба фаъолият шурӯъ намуд. Дар нахустин ҷаласаи он масъалаҳои ташкилӣ мавриди баррасӣ қарор гирифтанд.  Шамсиддин Орумбеков муовини раиси вилоят, роҳбари бахши бадахшонии комиҷроияи анҷумани тоҷикону форсизабонони «Пайванд», устоди Донишгоҳи давлатии шаҳри Хоруғ, доктори илмҳои филологӣ Назрӣ Офаридаев муовини ӯ интихоб шуданд. Раиси кумитаи иҷроияи анҷумани тоҷикону форсизабонони дунё «Пайванд» Исомиддин Салоҳиддинов зимни суханронӣ дар ҷаласаи муассисони бахши бадахшонии анҷуман иброз дошт, ки соли 2010 ба таъсисёбии анҷумани тоҷикону форсизабонони дунё «Пайванд» 20 сол пур мешавад.  20 сол қабл анҷуман ба хотири муттаҳидсозии тамоми тоҷикону форсизабононе, ки дар 30 мамлакати ҷаҳон зиндагӣ мекунанд, дар пиёдасозии масоили умдаи тоҷикону форсизабонон ба хотири эҳёи суннатҳои аҷдодӣ, эмин нигоҳ доштани онҳо аз хатари ҷаҳонишавӣ буд ва имрӯз анҷуман ин вазифаи хешро таҳти сарпарастии Президенти кишвар сарбаландона иҷро менамояд. Ман боварӣ дорам,- афзуд Исомиддин Салоҳиддинов, бахши бадахшонии анҷумани «Пайванд» корҳои бузургро хотима хоҳанд дод.