МУНОҚИШАИ НАВИ СИЁСӢ ДАР ЭРОН

                    Теҳрон, 25 июл. (АМИТ «Ховар»-Топ.РБК.ру).-Президенти Эрон Маҳмуд Аҳмадинажод ноиби аввали худ Исфандиёр Раҳим Машоиро ба истеъфо бароварда, талаби роҳбари олии маънавии мамлакат оятулло Алии Ҳоменеиро қонеъ кард. Ба ақидаи оятулло ноиби аввали президент таъин гардидани Р. Машоӣ на ба манфиати президент ва на ба манфиати ҳукумати мамлакат мебошад.                    Хабар дода мешавад, ки Р. Машоӣ қудои президенти Эрон Маҳмуд Аҳмадинажод аст. Ба вазифаи ноиби аввали президент таъин гардидани ӯ мухолифини президент ва оятулло Ҳоменеиро аз бисёр ҷиҳат ба хашму ғазаб овард. Бояд гуфт, ки оятулло Ҳоменеи барои ҳалли тамоми масъалаҳои дорои аҳамияти давлатию сиёсии Эрон ҳуқуқи комил дорад. Р. Машоӣ дар давраи интихоботи президенти Эрон шахси бовариноки М. Аҳмадинажод буд. Президенти Эрон расман 12 ноиб дорад, вале танҳо ноиби аввали ӯ дар ҳалли масъалаҳои сиёсию давлатӣ мавқеи махсус дорад.                    Р. Машоӣ соли 2008 вақте, ки дар вазифаи ноиби президент кор мекард ва масъули масъалаҳои туризм ва мероси фарҳангӣ буд, зимни сӯҳбат ақидаҳое изҳор менамуд, ки тарафдорони М. Аҳмадинажодро ба хашму ғазаб оварданд. Вай аз ҷумла изҳор карда буд, ки эрониҳо дӯстони ҳамаи халқҳои ҷаҳон аз ҷумла исроилиҳо мебошанд.   Инчунин Р. Машоӣ соли 2007 зимни сафараш ба Туркия дар ҷамъомади тантанавие ширкат варзид, ки дар он занон рақси халқиро иҷро карда буданд. Тавре ки маълум аст дар Эрон дар саҳна ё дар ҳузури мардон рақсидани занон манъ карда шудааст.