МУНШИИ УМУМИИ НАТО БА ШИФОХОНА ФИРИСТОДА ШУД

                    Брюссел, 22 июл. (АМИТ «Ховар» — РИА «Новости»). — Муншии умумии НАТО Яаап де Хооп Схеффер рӯзи сешанбе бо сабаби бад шудани аҳволи саломатиаш дар Брюссел ба шифохона фиристода шуд. Духтурон муқаррар намуданд, ки раги хунгарди вариди ӯ маҳкам шудааст, бо ҳамин сабаб ӯро ҷарроҳӣ карданд. Бемор айни ҳол дар шӯъбаи бемориҳои вазнин нигоҳ дошта мешавад.                    Хабар дода мешавад, ки муншии умумии НАТО рӯзи сешанбе дар чорбоғи марказии шаҳри Брюссел дар маросими ифтитоҳи деҳкадаи НАТО иштирок дошт. Ҳамон рӯз ҳаво ниҳоят гарм буд. Дар қарибии фарҷоми ҷамъомад Я.Х.Схеффер дар худ хастагӣ ҳис намуда, ба харак нишаст. Баъди чанд лаҳза вазъи саломатии ӯ бад шуд ва мошини ёрии таъҷилии тиббӣ беморро ба шифохона бурд.                     Схеффер охири моҳи июл курсии муншии умумии НАТО — ро тарк менамояд. Вай соли 1948 дар Амстердам таваллуд шудааст. Баъди хатми донишгоҳи Лейден аз соли 1976 дар сафоратхонаи Нидерландия дар Гана, аз соли 1980 то соли 1986 котиби вазири корҳои хориҷии Нидерландия, аз соли 1986 то соли 2002 вакили парлумони Нидерландия, аз соли 2002 вазири корҳои хориҷии Нидерландия ва аз соли 2003 раиси Созмони амнияту ҳамкории Аврупо шуда кор кардааст. Охири соли 2003 муншии умумии НАТО интихоб шуд. Ба туфайли ҷидду ҷаҳди ӯ шумораи мамлакатҳои аъзои НАТО аз 19 то 26 мамлакат зиёд шуд. Моҳи апрели соли равон дар интихоботи муншии ояндаи умумии НАТО сарвазири Дания Андерс Фог Расмусен ғалаба ба даст овард. Ӯ 3 август ба иҷрои вазифаҳояш шурӯъ менамояд.