ВАЗЪИ НОГУВОРИ СОҲАИ ФАРҲАНГИ ВИЛОЯТИ СУҒД

                  Хуҷанд, 29 июл. (АМИТ «Ховар», Санавбар Мақсудова ). — Муовини сардори раёсати фарҳанги вилояти Суғд Орифҷон Набиев ба АМИТ «Ховар» хабар дод, ки дар вилоят якчанд муассисаи фарҳангӣ, аз ҷумла Театри мусиқии драммавии ба номи Тӯҳфа Фозиловаи шаҳри Конибодом, Қасри фарҳанги ҷамоати Ашти ноҳияи Ашт, Қасри фарҳанги шаҳри Қайроққум, мактабҳои ҳунарии якум ва дуюми ноҳияи Спитамен ва ғайра кӯҳнаю фарсуда гардида, ба тармими куллӣ эҳтиёҷи калон доранд. Қайд карда шуд, ки имрӯз дар муассисаҳои фарҳанги вилоят 5130 нафар кор мекунад, ки 60 фоизи шумораи умумии кормандони соҳаро ташкил медиҳад. Маоши миёнаи моҳонаи кормандони соҳаи фарҳанг бо назардошти 30 фоиз зиёд гардидани он ба 160 сомонӣ расид.                 Дар вилоят кормандони китобхонаҳо, ҳунарпешагони касбӣ ва коргардонони театрҳо намерасанд. Яке аз сабабҳои асосии ин вазъият маоши ночизи кормандони соҳа мебошад. Мувофиқи Қонуни Ҷумҳурии Тоҷикистон «Дар бораи фарҳанг» ба кормандони соҳаи фарҳанг бояд дар бобати истифодаи қувваи барқ, об ва гази табиӣ имтиёзҳо дода шавад. Илова бар ин мақомоти маҳаллӣ ва ҷамоатҳо дар бисёр мавридҳо барои кормандони муассисаҳои фарҳангӣ қитъаи замин ва манзил ҷудо намекунанд. Бинобар ин мутахассисони ҷавони соҳаи фарҳанг касбу корҳои дигарро пеша карда, ё барои мардикорӣ ба Русия ва мамлакатҳои дигари хориҷӣ мераванд, гуфт дар хотима О.Набиев.                                                                                              Тарҷумон — Қудратов А.