ҶАМЪОВАРИИ ҒАЛЛА ДАВОМ ДОРАД

                Хуҷанд, 28 август. (АМИТ «Ховар», Санавбар Мақсудова). — Дар вилояти Суғд то 28 август 128 ҳазору 293 тонна ғалла ҷамъ оварда шуд, ки нисбат ба ҳамин давраи соли гузашта 7,8 фоиз зиёд мебошад. Муовини аввали сардори раёсати кишоварзии вилоят Рустам Раҳимов ба мухбири АМИТ «Ховар» гуфт, ки имсол дар қисмати шимолии мамлакат дар масоҳати бештар аз 89 ҳазор гектар ғалла корида шуд. То имрӯз ҳосили 73,4 ҳазор гектар ғаллазор ҷамъ оварда шуд. Ҷамъоварии ғалла дар ноҳияҳои Истаравшан, Ғончӣ, Кӯҳистони Мастчоҳ ва Айнӣ давом дорад.              Қайд карда шуд, ки ҳосилнокии миёнаи хар гектар ғаллазор 18,8 сентнериро ташкил медиҳад. Баъзе ноҳияҳо зиёда аз 30 сентнер ҳосил гирифтанд. Тибқи нақша имсол бояд дар вилоят 204 ҳазор тонна ғалла ҷамъ оварда шавад, гуфт Р.Раҳимов.