БУНГОҲҲО ВА ШӮЪБАҲОИ НАВИ ТАБОБАТӢ ДАР ВАҲДАТ

                  Душанбе, 20 август. (АМИТ «Ховар», Лаззат Диловарзод).- Дар мақомоти иҷрояи ҳокимияти давлатии шаҳри Ваҳдат ба мухбири АМИТ «Ховар» иброз доштанд, ки назорат аз болои муассисаҳои тандурустӣ, кори муоина ва муолиҷаи гурӯҳҳои камбизоати аҳолӣ сол аз сол беҳтар гардонида мешавад.                 Бо ин мақсад, дар деҳаҳои Адолат ва Деҳқонободи ҷамоати деҳоти Гулистон бунгоҳҳои саломатии нав сохта бо мутахассисон ва таҷҳизоти тиббӣ таъмин гардонида шуданд.                  Дар шӯъбаи шикастабандии ноҳия 2 ҳуҷра, дар маркази ёрии таъҷилӣ низ 2 ҳуҷра аз таъмири асосӣ бароварда шуданд.                 Масъулини беморхонаи марказӣ нақша доранд, ки рӯзҳои наздиктарин ошёнаи сеюми шӯъбаи таваллудхонаро бо дастгирии соҳибкорон пурра аз таъмир бароварда, ба «Маркази дандон — пизишкӣ» табдил диҳанд.