МИҚДОРИ ЗИЁДИ ГЕРОИН МУСОДИРА ГАРДИД

                           Хуҷанд, 5 август. (АМИТ «Ховар», Санавбар Мақсудова). — Кормандони раёсати Агентии назорати маводи нашъадори назди Президенти ҷумҳурӣ дар вилояти Суғд ҳамроҳи кормандони гумруки роҳи оҳани вилоят дар истгоҳи роҳи оҳани «Хуҷанд» зимни аз назар гузаронидани вагонҳои қатора 20 килограмму 254 грамм маводи нашъадори пуртаъсири героинро ошкор ва мусодира намуданд. Сардори раёсати назорати маводи нашъадори вилоят, генерал — майор Файзулло Абдуллоев зимни сӯҳбат бо хабарнигорон изҳор намуд, ки чунин миқдори зиёди маводи нашъадор дар ҳудуди вилоят дар давоми бештар аз се соли охир бори аввал мусодира карда шуд. Маводи нашъадор бо кӯмаки саги бӯгири раёсати агентии мазкур ошкор карда шуд, ки лақабаш «Дина» мебошад.                           Дар ҷараёни амалиёт соҳиби бори марговар сокини 29 — солаи шаҳри Истаравшан дастгир карда шуд, ки номи ӯ барои махфӣ нигоҳ доштани ҷараёни тафтиш зикр карда намешавад. Ба қавли шахси дастгиршуда, маводи нашъадорро моҳи январи соли равон сокини шаҳри Душанбе (номи ӯ низ махфӣ нигоҳ дошта мешавад) аз пойтахт оварда, ба сокини шаҳри Истаравшан додааст. Сокини шаҳри Истаравшан розӣ шудааст, ки ба ивази 10 ҳазор доллари ИМА маводи нашъадорро ба воситаи нақлиёти роҳи оҳан ба шаҳри Челябинск барад. Тибқи нақша, маводи нашъадор аз Челябинск ба шаҳри Орск бурда мешуд. Дар ин маврид интиқолдиҳандаи он соҳиби боз 10 ҳазор доллар мегашт.Ба қавли мутахассисон, нархи умумии маводи нашъадори мазкур дар чайқовбозор 3 — 4 миллион долларро ташкил медиҳад. Ф.Абдуллоев зикр намуд, ки соҳиби эҳтимолии маводи нашъадор дар шаҳри Душанбе шаҳрванд Р. низ дастгир карда шуд.                           Вобаста ба ин воқеа парвандаи ҷиноӣ кушода шуд ва тафтиши он давом дорад. Агар гуноҳи қочоқчиёни маводи нашъадор исбот гардад, онҳо мувофиқи қонун ба мӯҳлати то 20 сол аз озодӣ маҳрум карда мешаванд, гуфт дар хотима Ф.Абдуллоев.                                                                                                   Тарҷумон — Қудратов А.