ПИРӮЗИИ ВАРЗИШГАРОНИ ТОҶИК ДАР ШАҲРИ БИШКЕК

              Душанбе, 13 август. (АМИТ «Ховар», Ибодат Давлатова). — Варзишгарони тоҷик Аҳмадҷони Муҳаммад ва Бахтиёр Саъдуллоев дар мусобиқаи байналмилалӣ оид ба теннис дар шаҳри Бишкеки Қирғизистон ду медали биринҷиро ба даст оварданд.             Тавре аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон иттилоъ доданд, дар ин мусобиқа, ки таҳти сарпарастии Федератсияи байналмилалии теннис (ITF) баргузор шуд, 64 нафар писарон ва 64 нафар духтарони то 18-сола аз кишварҳои ИДМ, аз ҷумла Қазоқистон, Қирғизистон, Молдова, Русия, Тоҷикистон ва Ӯзбакистон ширкат варзиданд.              Аҳмадҷони Муҳаммад дар рақобатҳои инфиродӣ дар бозии ҳалкунанда бар намояндаи Русия Денис Столяров дар ду даст бозӣ бо ҳисоби якхелаи 6:4, 6:4 пирӯз шуда, мақоми севвумро касб намуд. Бахтиёр Саъдуллоев бошад, байни 64 нафар дар ҷои 9-ум қарор гирифт.                Инчунин теннисбозони тоҷик дар сабқати дунафарӣ то ба даври ниманиҳоӣ роҳ ёфта, барои ҷои севвум бар теннисбозони Қазоқистон бо ҳисоби 7:5, 6:2 ғолиб шуданд.                Тавре иттилоъ дода будем, беҳтарин теннисбозони тоҷик дар мусобиқаи кушоди ҷумҳуриявӣ барои дарёфти ҷоизаи Кумитаи ҷавонон, варзиш ва сайёҳии назди ҲҶТ, ки аз 15 то 19 август дар шаҳри Хуҷанд баргузор мешавад, ширкат меварзанд. Дар ин мусобиқа иштироки теннисбозони Қазоқистон, Қирғизистон ва Узбакистон дар назар аст.