САФАРИ ЗАНОНУ ДУХТАРОНИ ТОҶИК БА АМОРАТХОИ МӮТТАҲИДАИ АРАБ МАҲДУД КАРДА

                  Душанбе, 6 август. (АМИТ «Ховар», Жасмин Назарова). — Дар шароити душвори имрӯза, хусусан бо таъсири бӯҳрони шадиди молиявӣ мардикорони тоҷик асосан барои ёфтани маблағ ва таъмини рӯзгорашон ба мамлакатҳои собиқи Шӯравӣ, асосан ба Федератсияи Русия сафар мекунанд. Занону духтарони тоҷик дар аксари мавридҳо барои кор ба хориҷа рафта, қурбони дасисаҳои одамфурӯшон мегарданд. Бинобар ин мақомоти салоҳиятдори Аморатҳои Муттаҳидаи Араб дар баъзе мавридҳо метавонад аз додани раводиди вуруд ба занону духтарони хориҷии то 30 сола сарфи назар намояд. Занону духтарон ба ин мамлакат танҳо ҳамроҳи шавҳарон ё мардони хешу таборашон сафар карда метавонанд. Илова бар ин ба бачагони ноболиғ иҷозат дода мешавад, ки танҳо ҳамроҳи падару модаронашон ба хориҷа сафар кунанд. Агар фарзанди ноболиғ, хусусан духтарони аз 10 то 16 сола танҳо ҳамроҳи модар бе мушоияти падар ба сафар бароянд, дар ин маврид ба онҳо низ раводиди вуруди баъзе мамлакатҳои араб дода нахоҳад шуд. Дар ин бора дар ҷараёни нишасти матбуотӣ дар Корхонаи воҳиди давлатии «Майдони байналхалқии ҳавоии Душанбе» сухан рафт.                  Муовини директори генералии корхона Азиз Иброҳимов зикр намуд, ки занону духтарони тоҷик ба мамлакатҳои араб асосан аз Маскав ва баъзе шаҳрҳои Осиёи Марказӣ парвоз мекунанд. Аз ҷумла, чанд нафар зане, ки дар мамлакатҳои араб аз асорати одамфурӯшон наҷот дода шуда буданд, изҳор намуданд, ки аз Русия, Қирғизистон ва Қазоқистон ба Аморатҳои Муттаҳидаи Араб парвоз кардаанд.