ТАРЗИ НАВИ ҚАБУЛИ ИМТИҲОН ДАР ДОНИШГОҲИ ХОРУҒ

                      Бадахшон, 7 август. (АМИТ «Ховар», Лутфишо Додо).- Аз 1-уми август дар кулли донишгоҳҳои олии ҷумҳурӣ имтиҳоноти дохилшавӣ ба макотиби олӣ оғоз гардид. Аз ҷумла дар Донишгоҳи давлатии ба номи Моёншо Назаршоеви Хоруғ ҳам. Дар ин ҷо чанд сол боз имтиҳон ба тариқи тест мегузарад. Довталабон аз се фан: забону адабиёт, ҳуқуқ ва ихтисос имтиҳон месупоранд. Санҷиши компютерии тестӣ бо ширкати ректори Донишгоҳ Гулхоҷа Ҷангибеков ва волидайни хоҳишманд дар худи толори имтиҳонқабулкунӣ мегузарад. Аз ин лиҳоз, ҷараёни имтиҳонот шаффоф буда, волидайни довталабон аз тарзи қабули имтиҳонот розианд. Аз даврае, ки тарзи имтиҳони тестӣ дар ин донишгоҳ ҷараён дорад, то ҳоло шикояти волидайн аз қонунвайронкунӣ мушоҳида нагардидааст.