ТОҶИКИСТОН БОҒИ САРСАБЗ МЕШАВАД

                 Душанбе, 19 август. (АМИТ «Ховар», Лаззат Диловарзод).- Бино ба иттилои раиси Кумитаи ҳифзи муҳити зист Хурсандмурод Зикиров, соли 2009 барои парвариши ниҳолҳо дар хоҷагиҳои ҷангали ҷумҳурӣ хеле мусоид омад. Дар даҳҳаи аввали моҳи августи соли ҷорӣ ҳамаи ниҳолҳои дар тирамоҳи соли 2008 ва баҳори соли 2009 шинондашуда пурра аз назар гузаронида шуданд. Санҷиш нишон дод, ки 85 фоизи ниҳолҳо аз тарафи кормандони хоҷагиҳои ҷангал сабзонида шудаанд, ки ин дар 5 соли ахир бори аввал ба чунин муваффақият ноил шудани кормандони кумита мебошад.                Дар мавзеи «Сайёд» — и деҳоти Себистони ноҳияи Данғара аз 131 ҳазор бех ниҳоли шинонидашуда 95 — 97 фоизи он сабзидаанд. Дар ин мавзеъ ҳамчунин беш аз 892 кг тухмиҳои дарахтони ҳархела кишт карда шудааст.                Соли ҷорӣ дар хоҷагиҳои ҷангал ба миқдори 250 кг тухмии дарахтони санавбар ҷамъоварӣ карда шуда, майдони ниҳолхонаҳои хоҷагиҳои ҷангал ба 43, 19 га ва майдони парвариши ниҳолҳою кӯчатҳо ба 55, 94 га расонида шудааст, ки дар он 2 млн.230 ҳазор ниҳол парвариш меёбад.