ҶАШНВОРАИ ОМӮЗИШИ ЗАБОНИ РУСӢ

                  Душанбе, 29 сентябр. (АМИТ «Ховар», Людмила Дубинина). – Бо ташаббуси Вазорати маориф ва илми Федератсияи Русия, Агентии Федералии маорифи Русия, Маркази маърифати байналмилалии Донишгоҳи давлатии Маскав ба номи Ломоносов, Донишкадаи сертификатсияи сифати маориф ва Донишгоҳи миллии Тоҷикистон аз 5 то 8 октябри соли равон ҷашнвораи омӯзиши забони русӣ гузаронида мешавад. Тибқи нақша, дар он бештар аз 350 нафар иштирок хоҳад кард.                   Дар доираи ҷашнвора гузаронидани семинари илмию амалӣ пешбинӣ карда мешавад. Дар машварати махсус проблемаҳои таълими забону адабиёти рус дар Тоҷикистон муҳокима карда хоҳанд шуд. Дар озмуни забону адабиёти рус теъдоди зиёди талабагон ва донишҷӯён иштирок хоҳанд кард.                 Ҳадафи ҳамаи ин тадбирҳо нигоҳ доштани нуфузи забони русӣ дар қаламрави ИДМ ва вусъат додани фазои иттилоотӣ ба забони русӣ дар мамлакатҳои собиқи шӯравӣ мебошад.