ДАР ДУШАНБЕ СТАНДАРТҲОИ КИШВАРҲОИ УЗВИ СҲИ-РО ҲАМОҲАНГ МЕСОЗАНД

                 Душанбе, 28 сентябр. (АМИТ «Ховар», Бекназари Абӯбакр). — Имрӯз дар шаҳри Душанбе бо ибтикори Созмони ҳамкориҳои иқтисодӣ (СҲИ) ва Агентии давлатии «Тоҷикстандарт» семинари омӯзишӣ оид ба стандартизатсия, метрология, ташхис ва сифат доир гардид.                  Диретори Агентии стандартизатсия, метрология, сертификатсия ва нозироти савдои назди Ҳукумати ҶТ Давлаталӣ Ҳотамов роҷеъ ба ҳамкориҳои Тоҷикистон бо СҲИ маълумот дода, зикр кард, ки масъалаҳое, ки дар ин семинар мавриди баррасӣ қарор мегиранд, аз масоили муҳиме иборатанд, ки аҳамияти байналмилалӣ дошта, дар густариши минбаъдаи тиҷорат ва сифатнокии маҳсулот дар кишварҳои узви СҲИ мусоид мебошанд.                   Гуфтанист, ки дар ин семинар масъалаҳои амалисозии даври дуюми лоиҳаи СҲИ ва ЮНИДО оид ба стандартизатсия, метрология, ташхис ва сифат, ҳамоҳангсозии стандартҳо, мавқеи метрология дар системаи Созмони умумиҷаҳонии савдо, ченкунӣ ва иштибоҳоти ченкунӣ, системаи идоракунии сифат ва амсоли инҳо мавриди баррасӣ қарор мегиранд.