МУҲОҶИРОНИ МЕҲНАТӢ БА БЕЛОРУС ФИРИСТОНИДА МЕШАВАНД

                Душанбе, 17 сентябр. (НИАТ «Ховар», Бекназари Абӯбакр). — Дар давоми 8 моҳи соли ҷорӣ 487 ҳазору 703 нафар шаҳрвандони Ҷумҳурии Тоҷикистон барои кор ба хориҷи кишвар сафар намуданд, ки аз онҳо тариқи субъектҳои хоҷагидори дорои иҷозатнома барои фаъолияти бокортаъминкунии шаҳрвандони Тоҷикистон дар хориҷи кишвар 10 ҳазору 717 нафар дар Федератсияи Русия ва ИМА бо кор таъмин карда шуданд. Аз шумораи зикргардида 9 ҳазору 911 нафарашон мардон ва 806 нафарашон занон мебошанд.                  Дар ҳудуди Федератсияи Русия 405 ҳазору 600 нафар муҳоҷирони меҳнатии ҶТ дар Хадамоти федералии муҳоҷирати Русия ба қайд гирифта шуда, ба 23 ҳазору 200 нафар иҷозатнома барои зиндагии муваққатӣ ва ба 107 нафар иҷозати истиқомати доимӣ дар қаламрави Федератсияи Русия дода шудааст.                    Қобили зикр аст, ки соли ҷорӣ бори аввал бо мусоидати Хадамоти муҳоҷирати ВКД кишвар байни ҶДММ «Строительный трест №13»-и Ҷумҳурии Белорус ва КВ «Биржаи меҳнати ҷавонон» шартномаи ҳамкорӣ баста шуд, ки дар заминаи он 9 нафар мутахассисони хиштчини тоҷик муташаккилона барои кор ба корхонаи мазкур равон карда шуданд.