МУҲОКИМАИ ПРОБЛЕМАҲОИ ЗИНДАГИИ ВЕТЕРАНҲО

                  Душанбе, 16 сентябр. (АМИТ «Ховар», Таҳмина Ғоибназарова). — Аз 25 то 27 ноябр дар Маскав маҷлиси раёсати Шӯрои ҳамоҳангсози «Иттиҳоди созмонҳои ҷамъиятии ветеранҳо» баргузор мегардад. Дар он роҳбарони созмонҳои ветеранҳои ҷанг, коргарони ақибгоҳ ва нафақахӯрони мамлакатҳои ИДМ, Латвия ва Эстония ширкат меварзанд. Созмонҳои ветеранҳои ҷанг ва коргарони ақибгоҳи мамлакатҳои ИДМ айни ҳол бештар аз 58 миллион иштирокчиёни ҷанг, коргарони ақибгоҳ ва нафақахӯронро муттаҳид месозад. Дар маҷлис проблемаҳои марбут ба фаъолияти Шӯроҳои ветеранҳо муҳокима карда мешаванд.                  Аз Тоҷикистон дар маҷлиси мазкур раиси Шӯрои ветеранҳои ҷумҳурӣ Раҳматҷон Қудратов иштирок менамояд. Вай дар бораи таҷрибаи Тоҷикистон дар бобати беҳтар сохтани шароити зиндагии ветеранҳои ҷанг, фаъолияти Шӯрои ветеранҳои мамлакат ва ташкилотҳои ибтидоии он нақл мекунад.                   Аз рӯи натиҷаҳои маҷлис самтҳои асосии фаъолияти созмони байналхалқии иттиҳодияҳои ветеранҳои ИДМ муайян карда хоҳад шуд.