ОҒОЗИ МАЪРАКАИ ДОРУГУЗАРОНӢ

                 Душанбе, 28 сентябр. (АМИТ «Ховар», Кристина Эрлих). – Имрӯз дар саросари мамлакат маъракаи доругузаронӣ ба организми бачагони аз 1 то 14 сола барои пешгирии бемориҳои гул ва сурхча оғоз ёфт. Маъракаи мазкур то 12 октябр давом мекунад. Дар давоми он ба организми бештар аз 2,5 миллион нафар бачагон дору гузаронида хоҳад шуд.                  Аз Маркази доругузаронии ҷумҳурӣ ба АМИТ «Ховар» хабар доданд, ки ба организми бачагон дар дармонгоҳҳо, мактабҳо, интернатҳо ва муассисаҳои табобатии тамоми минтақаҳои ҷумҳурӣ, аз ҷумла, шаҳру ноҳияҳои дурдаст дору гузаронида мешавад.                  Муассисаи наҷоти атфоли СММ барои дастгирии маъракаи доругузаронӣ дар Тоҷикистон миқдори зарурии дору, сӯзандоруҳои якдафъаина, яхдонҳо, сумкаҳо ва асбобу анҷоми дигари лозимӣ харида, тӯҳфа кард. Ба туфайли ин доруҳои заруриро ба маҳалҳои дурдасттарини ҷумҳурӣ бурдан имконпазир мегардад.                  Муассисаи наҷоти атфоли СММ ҳамчунин барои огоҳ намудани аҳолӣ аз маъракаи доругузаронӣ ва ташвиқу тарғиби он маводи иттилоотӣ, аз чумла, варақаю плакатҳо нашр намуда, дар телевизион ва радио бо ин мақсад рекламаҳо намоиш дода ва пахш менамояд.                 Маъракаи доругузаронӣ дар Тоҷикистон бо ташаббуси Вазорати тандурустии мамлакат бо кӯмаки Муассисаи наҷоти атфоли СММ, Созмони ҷаҳонии тандурустӣ ва Ҷамъияти Ҳилоли Аҳмари Тоҷикистон гузаронида мешавад.                   Бемориҳои гул ва сурхча бемориҳои сирояткунанда буда, дар мавриди табобат накарданашон сабаби маъюбӣ ва ҳатто вафоти бачагон мегарданд. Бинобар ин гузаронидани дору барои пешгирии бемориҳори мазкур ба организми бачагон аҳамияти ниҳоят калон дорад.