ОМОДАГИИ ДУШАНБЕ БА СИМПОЗИУМИ ҚАРИБУЛВУҚӮЪИ БАЙНАЛМИЛАЛӢ

                 Душанбе, 22 сентябр.(АМИТ «Ховар», Марзия Саидова).-Масъалаи омодагии пойтахт ҷиҳати дар сатҳи баланд баргузор намудани Симпозиуми байналмилалӣ бахшида ба 1310 –солагии Имоми Аъзам, ки рӯзҳои 5-6 октябри соли равон дар шаҳри Душанбе баргузор мегардад, дар ҷаласае, ки 22 сентябр дар ҳузури Раиси шаҳри Душанбе Маҳмадсаид Убайдуллоев баргузор шуд, баррасӣ гардид.                   Раиси шаҳр бо инобати таҷрибаи мавҷудаи пойтахт ҷиҳати гузаронидани чорабиниҳои муҳими байналмилалӣ, масъулини шаҳру ноҳияҳои пойтахт, роҳбарони тамоми субъектҳои хоҷагидорӣ, меҳмонхонаҳо, марказҳои фарҳангию маишӣ ва аҳли ҷамоатчигиро муваззаф сохт, ки дар асоси нақшаҳои шаҳрдорӣ ва таомули шаҳрнишинӣ тамоми корҳои омодагию ободониро доир ба ин чорабинии бузурги фарҳангӣ, ки воқеъан муаррификунандаи асолати таърихии миллати тоҷик дар арсаи тамаддуни ҷаҳонӣ аст, ба анҷом расонанд.                  Назар ба итттилои котиби матбуотии Раиси шаҳри Душанбе Шавкат Саидов, дар ҷаласа ҳамчунин дигар масъалаҳои марбут ба рушду пешрафти пойтахт баррасӣ гардиданд.