СОХТМОНИ ПОЙГОҲИ ОБКАШИИ ШИНОКУНАНДА

               Суғд, 7 сентябр. (АМИТ «Ховар», Мирзалӣ Амонов, Самад Юсуфӣ). – Бо дастгирии Ҳукумати Ҷумҳурии Тоҷикистон дар вилояти Суғд пойгоҳи обкашии шинокунанда бунёд мегардад. Сохтмони ин пойгоҳ дар мавзеи соҳили обанбори Қайроққум ба роҳ монда шудааст, ки дар радифи пойгоҳи обкашии шинокунандаи Хоҷабоқирғон, ки алҳол фаъолият дорад, гузошта мешавад.               Пойгоҳи обкашии шинокунанда дар ҳар сония зиёда аз 14 метри мукааб об мекашад. Зеро пойгоҳи нав дорои 8 насос ва муҳаррикҳои обкашии иқтидори ҳар яки он кашидани 1,8 метри мукааб об дар як сония мебошад.                Барои сохтмони пойгоҳ ширкатҳои хориҷӣ ҷалб шудаанд. Пудратчии асосӣ ширкати ИФМС – «Колон»-и Кореяи Ҷанубӣ мебошад. Сохтмони корпуси пойгоҳи барқии обкашии шинокунанда аз ҷониби ширкати «Техмарин ЛТД»-и заводи таъмири киштиҳои шаҳри Бокуи Ҷумҳурии Озорбойҷон анҷом дода мешавад.