ВАРЗИШГАРОНИ ТОҶИК МУСОБИҚАРО ДАВОМ МЕДИҲАНД

                 Душанбе, 4 сентябр. (АМИТ «Ховар», Пайрав Назаров). – Дар шаҳри Милани Италия мусобиқоти қаҳрамонии боксчиёни ҷаҳон давом дорад. Тавре хабар дода шуда буд, дар он гурӯҳи боксчиёни тоҷик низ ширкат меварзанд.                 Имрӯз, аз ҷумла, боксчии тоҷик Ҷаҳон Қурбонов бо варзишгари Словакия Борут Слапник қувваозмоӣ карда, ӯро бо ҳисоби калони 12:0 мағлуб кард. Ҷ.Қурбонов ба ҳарифи худ имкон надод, ки ба ҷисми ӯ ягон маротиба зарба занад. Қувваозмоии навбатии Ҷ.Қурбонов 6 сентябр барпо мегардад.                 Боксчии дигари тоҷик Ҷаҳонгир Убайдуллоев дар вазни 69 килограмм бо намояндаи Ҷумҳурии Африқои Марказӣ Бруно Бонгонго қувваозмоӣ карда, ӯро мағлуб намуд. Қувваозмоии навбатии ӯ ба рӯзи 6 сентябр таъин гардид. Ин дафъа Ҷ.Убайдуллоев бо Торден Киллер қувваозмоӣ хоҳад кард.               Варзишгари дигари тоҷик Мадади Нағзибеков бегоҳии имрӯз бо намояндаи давлати Того Тонде Сараун қувва меозмояд.               Мухбири АМИТ «Ховар» хабар медиҳад, ки баъди се рӯзи мусобиқаи мазкур дастаҳои мунтахаби Австрия, Туркманистон, Чили, Боливия, Панама, Индонезия, Непал, Шри – Ланка, Малта, Самоа, Полинезия, Фиҷи, Ҷумҳурии Африқои Ҷанубӣ ва ғайра тамоми қувваозмоиҳоро бой дода, аз мусобиқа хориҷ гардиданд.               Қисми зиёди варзишгарони мамлакатҳои дигар низ мағлуб шуданд. Имрӯз қувваозмоиҳои мусобиқаро 4 варзишгар аз Кения, 2 варзишгар аз Ҷопон, 4 варзишгар аз ИМА, се нафарӣ аз Ҳиндустону Афғонистон, Босния ва Герсеговина, Белорусия, Маҷористон, Австралия, Урдун, Покистон, Гурҷистон ва Тоҷикистон, 2 нафарӣ аз Канада, Булғористон, Мексика, Албания, Украина, Испания, Чехия, ва ғайра давом медиҳанд.