ЯРМАРКАҲО ФАЪОЛИЯТ ДОРАНД

               Душанбе, 4 сентябр. (АМИТ «Ховар», Лаззат Диловарзод).- Дар шаҳри Душанбе то оғози соли хониш 21 нуқтаи фурӯши либосҳои мактабӣ ташкил карда шуда буд.               Тибқи қарори раиси шаҳри Душанбе Маҳмадсаид Убайдуллоев, фаъолияти ин нуқтахои фурӯш то 8 –уми сентябр идома дода мешаванд.               Бо вуҷуди саршавии соли хониш ярмаркаҳо кори худро давом медиҳанд. Мақсад аз нигоҳ доштани 21 нуқтаи фурӯши либосҳои мактабиро дар ҳукумати шаҳр шарҳ дода гуфтанд, ки оилаҳои камбизоате, ки то саршавии соли хониш фарзандони худро бо сару либоси мактабӣ таъмин кардан натавонистанд, ҳукумати шаҳр имконият дод, ки баъд аз гирифтани маоши августӣ онҳо тавонанд аз ярмаркаҳо истифода кунанд.               Мушоҳидаҳо нишон дод, ки то рӯзи 3 – юми сентябр дар мактабҳои пойтахт иштироки хонандагон бо сабабҳои гуногун 100 фоиз таъмин нест. Аксари иштирокнакардагон аз оилаҳои камбизоатанд, ки сару либоси мактабиро тибқи дастурамали Вазорати маориф надоранд.