ЗАРУРАТИ ТАҚВИЯТИ ҲАМКОРӢ ДАР МУБОРИЗА БА МУҚОБИЛИ ЗУҲУРОТИ НОМАТЛУБ

                Душанбе, 7 сентябр. (АМИТ «Ховар», Наргис Бояхмедова, Пайрав Назаров).- Президенти Ҷумҳурии Тоҷикистон Эмомалӣ Раҳман ва президенти ҷумҳурии Ҳиндустон Пратибха Девисингх Патил имрӯз баъди анҷоми мулоқоташон барои воситаҳои ахбори оммавӣ изҳорот дарҷ намуданд.                  Эмомалӣ Раҳмон зикр намуд, ки зимни мулоқот бо Президенти Ҳиндустон ба рушди ҳамкорӣ дар соҳаҳои гуногуни иқтисодиёт ва таъмини амнияти минтақавию байналхалқи диққати махсус дода шуд.Вай афзуд, ки ҳаҷми хариду фурӯши мол дар байни Тоҷикистону Ҳиндустон сол то сол меафзояд. Маблағи хариду фурӯши мол байни ҳар ду кишвар дар давоми ҳафт моҳи соли 2009 25 миллион доллари ИМА-ро ташкил намуд, ки нисбат ба ҳамин давраи соли гузашта 17% зиёд мебошад.                Қайд карда шуд, ки Тоҷикистону Ҳиндустон роҷеъ ба бисёр проблемаҳои минтақавию байналхалқӣ мавқеъҳои якхела ё ба ҳамдигар наздик доранд.                 «Мо чунин мешуморем, ки ҷузъи муҳимтарини ҳамкории мамлакатҳои моро дар шароити имрӯза тақвияти ҳамкорӣ дар мубориза ба муқобили зуҳуроти номатлуби замони ҳозира, аз ҷумла терроризм ва хариду фурӯши ғайриқонунии маводи нашъадор ташкил медиҳад», гуфт Э. Раҳмон.                 Президенти Ҳиндустон П. Д. Патил изҳор намуд, ки мамлакатҳои минтақа бояд ҳамкориро дар баробари вусъати равобити иқтисодӣ дар мубориза ба муқобили терроризм пурзӯр намоянд. Вай зикр намуд, ки маъмурияти мамлакаташ ҷидду ҷаҳди Тоҷикистонро дар мубориза ба муқобили терроризм ҳамаҷониба дастгирӣ менамояд.Инчунин қайд карда шуд, ки Ҳиндустон ба Тоҷикистон дар бобати амалӣ сохтани силсилаи барномаҳои таълимӣ, аз ҷумла тайёр кардани кадрҳои низомӣ кӯмак хоҳад расонд.