ҚИСМҲОИ ҲАРБИИ ХОРИҶӢ АЗ АФҒОНИСТОН БАРОВАРДА НАМЕШАВАНД

                 Кобул, 6 октябр. (АМИТ «Ховар», — afganistan.ru). – Вазири корҳои хориҷии Афғонистон Рангин Додфар Спанта зимни сӯҳбат бо хабарнигорон изҳор намуд, ки дар мавриди аз қаламрави мамлакат баровардани қисмҳои ҳарбии хориҷӣ Афғонистон дубора ба пойгоҳи низомии «Толибон» табдил ёфта метавонад.                   Ба қавли ӯ, Ҳукумати Афғонистон ба «Толибон» таслим нахоҳад шуд. Вале пирӯзӣ дар ин ҷанги нобаробар ҷидду ҷаҳди бештар ва маблағгузории зиёдро талаб менамояд.                  Вазир изҳори боварӣ намуд, ки барои ҳимояи мустақилонаи Афғонистон аз ҷангиёни мусаллаҳ камаш 260 ҳазор аскару афсар ва 140 ҳазор корманди политсия зарур аст. Вай мамлакатҳои ҷаҳонро даъват намуд, ки ваъдаҳояшонро дар бобати барқарор сохтани иқтисодиёти Афғонистон ва ташкили қувваҳои мусаллаҳи он иҷро намоянд.                   Айни ҳол аз Афғонистон баровардани қувваҳои ҳарбии хориҷӣ имконнопазир аст. Бо таассуф изҳор карда шуд, ки Покистони ҳамсоя мисли пештара ба ҷангиёни «Толибон» ҳамаҷониба кӯмак мерасонад. Мо исбот карда метавонем, ки дастаҳои силоҳбадастон аз Покистон ба Афғонистон меоянд, гуфт вазир. Вай Исломободро даъват кард, ки ҳамаи роҳбарони ҷунбиши «Толибон» — ро дар шаҳри Кветта дастгир намуда, ба мақомоти Афғонистон супорад. Қайд карда шуд, ки ҳамаи пойгоҳҳои низомии «Толибон» дар қаламрави Покистон ҷой дода шудаанд.