ФУТБОЛБОЗОНИ НАВРАСИ ТОҶИК БА КАТМАНДУ МЕРАВАНД

                   Душанбе, 2 октябр. (АМИТ «Ховар», Пайрав Назаров). – Аз 5 то 15 октябри соли равон дар пойтахти Непал – шаҳри Катманду мусобиқаи ихтисосии дастаҳои футболбозони навраси то 16 – солаи мамлакатҳои Осиё баргузор мегардад. Дар ин мусобиқа дастаи мунтахаби футболбозони навраси Тоҷикистон низ ширкат хоҳад кард.                     Мухбири АМИТ «Ховар» хабар медиҳад, ки футболбозони тоҷик дар ин мусобиқа ба гурӯҳи «В» дохил карда шуданд. Дар ин гурӯҳ бо футболбозони навраси тоҷик варзишгарони Эрон, Баҳрайн, Лубнон, Непал ва ҷазираҳои Малдив қувваозмоӣ хоҳанд кард.                     Тибқи нақша қувваозмоии футболбозони навраси тоҷик бо футболбозони Эрон 7 октябр, бо футболбозони Лубнон 10 октябр, бо футболбозони ҷазираҳои Малдив 12 октябр ва бо футболбозони Непал 15 октябр баргузор мегардад.