НАРХИ МАНЗИЛИ ИСТИҚОМАТӢ БОЛО МЕРАВАД

                 Душанбе, 6 октябр. (АМИТ «Ховар», Лаззат Диловарзод).- Бино ба гуфти сардори Ассотсиатсияи сохтмончиёни Тоҷикистон Файзалӣ Раҷабов, дар Ҷумҳурии Тоҷикистон 1500 ширкати сохтмонӣ фаъолият дорад, ки аз он танҳо 20 ширкат ба сохтмони хонаҳои истиқоматӣ машғул мебошад.                  Аз ибтидои соли 2008 то имрӯз барои сохтмони хонаҳои истиқоматӣ амалан маблағ ҷудо карда нашудааст. Ширкатҳои давлатии хонасоз умуман дар ҷумҳурӣ вуҷуд надоранд. Тамоми ширкатҳои сохтмонӣ хусусӣ мебошанд.                    Дар сурати набудани ширкатҳои давлатии хонасоз қобилияти рақобатпазирии ширкатҳои хусусӣ боло рафта, паст шудани арзиши манзили истиқоматӣ аз байн меравад. Алҳол 1 метри квадратӣ хонаҳои истиқоматии дар канори шаҳр ҷойгиршуда баробари 500 – 800 ва дар марказ 1500 долари амрикоӣ ва аз он ҳам зиёд арзиш доранд.                      Бо андешаи коршиносон нархи манзили истиқоматӣ дар ҷумҳурӣ нисбат ба давраи соли 2008 ва ибтидои соли 2009 -5 фоиз боло рафтааст.