САТҲИ ЗИНДАГИИ АХОЛӢ БЕҲТАР ШУД

                  Душанбе, 23 октябр. (АМИТ «Ховар», Лаззат Диловарзод).- Аз рӯи маълумоти пешакӣ, даромади пулии аҳолӣ дар 9 моҳи соли ҷорӣ 5 млрд. 802,9 млн. сомониро ташкил кард,- иброз дошт вазири меҳнат ва ҳифзи иҷтимоии аҳолии Ҷумҳурии Тоҷикистон Шукурҷон Зуҳуров дар нишасти матбуотӣ ба хабарнигорони дохилу хориҷи кишвар.                   Тибқи ҳисоби оморӣ, арзиши маҷмӯи маҳсулоти хӯрокворӣ, ки ба сабади истеъмолӣ дохил мешавад, барои рӯзгузаронии ҳар як нафар аҳолии кишвар моҳе мутобиқи меъёри ғизои истеъмолӣ бо нархҳои охири моҳи августи соли 2009 аз рӯи истеъмоли ҳақиқӣ 91 сомонию 51 дирам ва дар сурати меъёри истеъмоли оқилона 179 сомонию 22 дирамро ба ҳар як узви оила ташкил намуд.                  Музди миёнаи меҳнатии кормандон дар 9 моҳи соли 2009 дар ҳамаи соҳаҳои ҷумҳурӣ 285 сомонию 66 дирам (ё 64,92 доллари амрикоӣ) — ро ташкил дод, ки нисбат ба ҳамин давраи соли гузашта 32,8 фоиз афзоиш ёфтааст, ки ин аз беҳ шудани сатҳи зиндагии аҳолӣ дар соли 2009 гувоҳӣ медиҳад, — афзуд вазир дар нишасти матбуотӣ.